كاملة ابو ذكري..الراجل الحقيقي في حياتي هو ابويا الله يرحمه
– بما انك ست قوية ومستقلة امتى بتحسي انك محتاجة الراجل في حياتك وضعيفة من غيره؟
= الراجل الحقيقي في حياتي هو ابويا الله يرحمه واخويا ربنا يديله العمر والصحة يارب ويخليه ليا غير كده انا ماشوفتش لا ضهر ولا سند .. انتي ممكن تبقي قوية جدا في شغلك وضعيفة في الحب أو بتحبي تبقي العكس خصوصا لما تبقي بتشتغلي شغلانة انتي فيها محتاجة تبقي زي الراجل .. مفيش ست مش محتاجة راجل
– كاملة أبوذكري ست ضعيفة في الحب؟
= آه ضعيفة جدا
-الحب كسرك ولا قواكي؟
= كسرني كتير .. اخترت غلط اوي
– لحد دلوقتي ندمانة؟
= لا انا مش ندمانة كل حاجة بتتعلمي منها الحلوة والوحشة .. كنت اتمنى ابقى نجحت في حياتي الشخصية زي العملية كنت أتمنى يبقى في سند ليا وضهر وونيس في حد معاكي كنت أتمنى
-ليه شايفة دموع في عينك اتوجعتي أوي من الحب؟
= آه
-لسه فاكرة الموضوع؟
= هو لسه خلصان من 4 شهور كان طلاق .. كل حاجة بتعدي مفيش حاجة مابتعديش ده انا امي وابويا ماتوا وعيشت وكملت واشتغلت
-مش هتحبي وترتبطي تاني؟
=لا لا خلاص أعوذ بالله
– انتي اتجوزتي قد ايه؟
=اتجوزت مرتين مرة 3 سنين ومرة 8 سنين
– وهانت العشرة بعد 8 سنين؟
= كل حاجة بتخلص 
