غير مفهوم

بقلم / منتصر هلال
تساؤلات كتير من ناس كرهت الجواز من كتر ما شافوا أمثلة محبطة ليه وكل شوية حد يقولك اتجوز ومتتجوزش وكل واحد بيعمم تجربته على الناس كلها وكل اللي بيتكلموا نسيوا أننا كلنا مختلفين اختلافنا ده بيميزنا من بعض
احنا تقريبا تهنا في آراء غيرنا بقينا بنحاول نلبس آراء مش على مقاسنا عشان متخيلين أنها مسطرة السعادة
انا شايف المفروض البنت تجوز
تجوز اللي يصرف عليها ويرعاها ويرعي اولادها
اتجوزي اللي خريج كلية كويسة مستقبله مضمون من تقليل من شأن حد حشا وكلا ولكن وجهة نظر
اتجوزي اللي بيت اهله مستقر هيحافظ عليكي
مش مهم الشكل المهم الإحترام
متتجوزيش واحد أرمل معاه اطفال هيتعبك
ونيجي نسأل دلوقت ليه الطلاق كتتتتتير اوي ؟
لأن مفيش قاعدة أنت بتدور على نتيجة تبني عليها جوازك فحطيت نفسك في قالب منعك تشوف وسع الإختيارات
ناس اغلبها اتجوزت بناء على الموافقة المجتمعية لشكل الجواز الفرح والنيش والعفش والشقة والفستان وشهر العسل والي اخره من امور تشتت انتباه اى عريس وعروسة عن هما داخلين على إية وهيعملوا إيه
لدرجة أن بعض البنات والشباب بيتجوزوا عشان الحياه تمشي وبيختاروا بناء على الشكل وبس
ونسيوا أن الشكل بعد فترة من إشباعه بيطفي أما لو هناك انجذاب الشخص بيرتاح وبيتحول لمشاعر سكن وود وحنان وإهتمام وده كله بيستلم من الإنجذاب لما يكون في عوامل شخصية لكل واحد تسمح بأنه يلاقي معاني اعمق تكمل بيها
هو مراحش هو بس اتطور ونضج لمشاعر مناسبة أكتر لواقعية الحياة .فلما الإنجذاب يتحول ما يلاقيش شىء يتحول له لأن هما اتزنقوا في جوازه من غير ما يفهموا أن في مقومات تانية محتاجينها عشان يقدروا يكملوا فيبدأوا يتفاجئوا بالعيوب مع المسؤوليات فتحصل القفلة والفجوة
أنا مش هقولك اتجوز مين انا هقولك تفكر في شىء واحد لما اقولك انك هتعيش مدى حياتك مع شخص واحد
تتمنى يبقى عامل إزاى ؟ إيه أكتر معنى بيعيش ويقدر يتحمل الحياة بكل صعابها ؟
هل الإنجذاب ؟
هل الإنبهار بالمميزات؟
هل الإحترام ؟
هل المسؤولية؟
البشر كلهم عندهم درجات من كل معنى محتاجاه الدنيا عشان تستمر والواحد لما بيختار بيختار شخص عنده كل الصفات دي لأن كل معنى من دول هيأثر على حياتك إيجابا فلما تختار بذور كل معنى تقدر برعايتك ليها وسقياها تكبر فتقدر في كل مرحلة تعلي من معنى المرحلة اللي محتاجاها