الدنيا دواره يا صاحبي
بقلم/نشأت البسيوني
الدنيا دي يا صاحبي عجيبه يوم تضحكلك ويوم تبكيك يوم تحس إنك طاير من الفرح ويوم تلاقي نفسك تايه وسط همومك ومش لاقي مخرج بس صدقني مفيش حاجه بتفضل على حالها لا وجع بيدوم ولا فرحه بتستمر كل حاجه ليها وقتها وربنا بيبدل الأحوال زي ما الليل بيبدل النهار إحنا ساعات بنزعل على حاجه راحت ومش بنشوف إن يمكن راحت عشان ربنا كان شايف إنها مش لينا يمكن اتأخر عليك حلم يمكن اتكسر فيك أمل بس عمر ربنا ما بيأخر رزق عبد بيحبه بس بيختار له التوقيت الصح الدنيا دواره اللي بيظلم النهارده ممكن يتظلم بكرا واللي بيكسر قلوب الناس هييجي عليه يوم ويتمنى حد يطبطب على قلبه فمتشيلش هم غيرك ظلمك ولا تفرح إنك وقعت حد لأن الدوره دي مش بتقف عند حد والحق دايما بيرجع ولو بعد حين اتعلمت إن الطيبه مش ضعف وإن السكوت مش دايما هزيمه وإن الصبر بيجيب اللي محدش يتوقعه في ناس بتبعد عنك عشان مصلحتها وفي ناس بتقرب منك عشان تحبك بجد متقيسش الناس بكلامهم قيسهم بمواقفهم لأن الكلام سهل لكن الفعل هو اللي بيكشف كل حاجه عيش حياتك على قد ما تقدر متضيعهاش في زعل أو حزن أو ندم عشان الأيام اللي راحت مش راجعه واللي جاي محتاجك أقوى سافر جوا نفسك شوف مين يستحق وجودك ومين وجوده عبء عليك خليك صادق خليك بسيط ومتنساش تحب نفسك الأول لأن محدش هيحسك غيرك الدنيا دي امتحان طويل بس الجميل فيها إنك تقدر تبدأ من جديد في أي لحظه ابعد عن الغل عن الحقد عن الكره واملأ قلبك رضا لأن اللي بيرضى بيعيش مرتاح حتى لو الدنيا قامت عليه وفي الآخر لما تبص وراك متندمش على حاجه لأن كل خطوه وجعك فيها كانت بتقوّيك وكل خيانه علمتك وكل فراق خلاك تعرف قيمه اللي كان بيحبك بجد الدنيا دواره يا صاحبي خليك دايما واقف وإوعى تنسى إن اللي بيزرع خير لازم يوم يحصده
