عيد حساباتك
كلمات / الشاعر اللواء محمد هيكل
عيد حسـاباتك ياللي معاشـر …. ناس عمـرها ما تٱمـن بيـك
وان صفصفوا على واحد شاري ..أفضل من ملايين حواليك
لسه هتفرح و تقـول عـزوه …. و فاكـر كل النـاس هتشيـلك
فاضـل ف الأيـام كام نـزوه ….. علشان تفــرح باللي باقيلك
ماشي تصاحب ناس مش منك .. وتسيب قلبك عادي رهينه
تفـرح بالبـدايـات مع إنـك ……. بتعيـش كل نهــايه حــزينه
فاتح باب قلبـك ع الآخـر ……. ماشي تحب منين ما تقـابل
إنت لإمتـى هتفضل ساذج ….. شـــايف كل الخلـق بـلابـــل
ليه هتقضي العمـر تجارب ….. و تسيب قلبـك ف البتــارين
ناس تتفرج حبه وتمشي … وناس هتقول محناش شاريين
لم مشاعرك ما تسيبهاش …. تاخدك على ندمك و جروحك
سعرك بقي مدي على بلاش..وانت اللي عملت كده فروحك
خلق كتير قابلوك فحياتك …. جرحـوا القلب و داسوا عليه
بس ساعات فيه حد بعينه …. بيشيل خاطـرك جـوه عنيـه
حد مشاعـره ما بتخوفشي …. مهمـا فضلت معـاه ل سنين
حد يشـوفك بس ب قلبـه …. مـش ب عيــون البني ٱدمين
وحيٕـاة ٱخـر حــزن فاضلك ….. غربـل كل النـاس من تاني
ما انت مليت القلب حبايب ….. بس أديك عايش وحداني
عيد حساباتك ف اللي ٱمنتو ..واللي ضحكت معاه وبكيت
ركـز و افــرز مين يستـاهل .. يبقى ف قلبـك صاحب بيت
