من وجع لقوة… ومن قوة لبداية جديدة
بقلم/نشأت البسيوني
بعد ما الوجع خلاني أقف على رجلي وبعد ما اتعلمت أقرا الناس من سكوتهم وأفهم الخداع من أول كلمة حلوة جالي يوم بصيت فيه لنفسي في المراية وقلت خلاص كفايه وجع أنا استاهل أعيش بسلام مكنتش مصدق إني ممكن أبتدي من الصفر تاني بس الحقيقة إن كل مرة بننهار فيها ربنا بيخلق جواك نسخه جديدة منك نسخه أقوى أهدى أذكى وأوعى بكتير بقيت لما بصحى الصبح ما بستناش حاجه من حد بقيت بضحك لنفسي في المراية وأقول صباح القوة يا أنا اللي عدى وجعه ولسه واقف ما بقتش أدور على حب يرميني في ضعف ولا صاحب يوجعني باسم الصحوبية بقيت أختار بعقلي وأسيب اللي ما يستاهلش من غير تردد اللي كانوا زمان سبب وجعي بقوا بالنسبالي ذكريات ذكريات علمتني أفرق بين اللي بيحب بصدق واللي بيحب علشان مصلحته تعلمت إن مش كل غياب خسارة في غياب هو اللي بيخلي قلبك يرتاح وبيفكرك إن مش كل اللي راح كان خير ليك بدأت أعيش لنفسي أتعلم أشتغل أحقق اللي كنت بأجله علشان حد وأفرح بنجاحي حتى لو محدش صفقلي الناس اللي كانت بتضحك وقت ما كنت بتقع دلوقتي بتسقفلك وانت بتقوم مش حبا فيك بس علشان عرفوا إنك مش بتتهز اتعلمت أتعامل مع الدنيا على إنها اختبار كبير مفيش فيه إجابات نموذجية كلنا بنتعلم من أخطائنا من وجعنا من سقوطنا بس الفرق بين اللي بيتكسر وبين اللي بيقوم هو إن اللي بيقوم قرر ما يخليش الوجع يدفنه القوه اللي جوايا دلوقتي مش بس من وجعي دي كمان من المرات اللي كنت فيها لوحدي ومحدش سأل عني بس أنا كنت بدعيلهم بالخير من المرات اللي كنت فيها محتاج حضن وملقتش غير نفسي أواسيها وأطبطب عليها الوجع خلاني ما أستناش دعم من حد خلاني أتعلم أكون الدعم لنفسي بقالي مبدأ كده بقول دايما اللي وجعني شكرا علمتني أوجعش نفسي تاني بقيت أختار راحتي النفسيه على أي حاجه ما بقتش أدور على رضا الناس ولا أعيش على مزاج حد بقيت أعيش بطريقتي اللي يرضى يكمل واللي مش عاجبه الباب مفتوح المثير في كل ده إنك لما بتقوى فعلا الناس بتبدأ تشوف فيك حاجه غريبه بيشوفوا فيك نفس الشخص اللي اتوجع بس المره دي واقف ومش بيقع بيشوفوا عيونك فيها هدوء بس جواه بحر من التجارب مليان أسرار مليان وجع اتحول لدهب دلوقتي لما حد يجي يحكيلي وجعه ما بقللوش منه بسمعه كويس وبقوله خد وقتك الوجع ده مش لعنة، ده بداية لأن فعلا مافيش قوه حقيقيه من غير وجع ومافيش بداية صادقة من غير نهاية موجعة دلوقتي عرفت إني ما خسرتش أنا بس اتطهرت من ناس كانت غلط فحياتي عرفت إن ربنا لما بياخد منك حاجه بيبقى بيجهزك لحاجه أكبر حاجه أنضف أصدق وأريح أنا النهارده مش زي مبارح مش لأن الدنيا اختلفت لكن لأن قلبي بطل يتهز بقيت أقابل الصدمات بابتسامة وبقيت أعرف إن بعد كل وجع في هدية مستنياني بس محتاج أصبر شوية وأكمل دراسته كل اللي مريت بيه خلاني أؤمن إن أقوى نسخه من الإنسان بتتولد من قلب وجعه اللي اتكسر واللي خدع واللي اتساب هو نفسه اللي بعد سنين بيقف ويقول أنا بقيت أحسن مش رغم الوجع لأ بسببه
